O luns 7 de marzo, ás 11.30 horas A Fundación Eugenio Granell organiza o acto simbólico de colocación dunha bufanda vermella na escultura de Ramón María Valle-Inclán na Alameda de Santiago de Compostela.
Este acto, que ven realizando desde o ano 2007, quere establecer unha conexión coa famosa colocación da bufanda branca na estatua de Valle-Inclán, no paseo de Recoletos, en Madrid, o día do teatro; pero neste caso para conmemorar o regreso real e simbólico de Valle a Compostela e a Galiza, a súa terra de orixe.
A Fundación Eugenio Granell entende que o seu compromiso coa creación non se circunscribe só ás artes plásticas, como tampouco seguen esta máxima o surrealismo, nin o propio Eugenio Granell, así está, dentro dos seus obxectivos, a tarefa de apoio e promoción á literatura.
Nesta liña continuamos, neste ano, a nosa colaboración co Museo Valle-Inclán da Pobra do Caramiñal, inciada por Natalia Fernández, directora da Fundación, no ano 2007, cunha serie de actividades, entre elas, a colocación da bufanda vermella a escultura do escritor no Paseo das Letras da Alameda Compostelá.
A ambas institucións únelles o interese por destacar a importancia da cidade de Compostela como vila valleinclaniana e a relación que se establece entre o surrealismo e o esperpento. Artes xurdidas do empeño por reinterpretar a realidade contemporánea dos nosos artistas.
